Інтэрнацыянальныя легіёны: Украіна цэніць кожнага замежнага добраахвотніка

Апошнім часам у публічнай прасторы пашыраецца шмат супярэчлівай інфармацыі адносна рэарганізацыі падраздзяленняў замежных добраахвотнікаў ва Украіне. Паспрабуем растлумачыць логіку змен, накіраваных на ўзмацненне баяздольнасці войска.

1. Што такое «Інтэрнацыянальныя легіёны» і як яны ўладкаваныя?

Варта разумець: «Інтэрнацыянальны легіён» — гэта не адна канкрэтная вайсковая частка, а агульная назва цэлай сеткі добраахвотніцкіх фармаванняў, якія дзейнічаюць у розных структурах Сіл абароны. Найчасцей, калі гавораць пра Легіён, маюць на ўвазе пяхотныя батальёны ў складзе Сухапутных войскаў УСУ і ТрА, створаныя на пачатку вялікай вайны для хуткага прыёму замежных добраахвотнікаў. Менавіта яны цяпер праходзяць этап трансфармацыі. Аднак яны не адзіныя.

Сёння працягваюць сваю дзейнасць спецыяльныя падраздзяленні:

• Міжнароднага легіёна ГУР МА, які выконвае складаныя разведвальныя задачы.

• У Сілах спецыяльных аперацый УСУ замежныя прафесіяналы інтэграваныя ў баявыя групы разам з украінскімі калегамі.

• Нацыянальная гвардыя актыўна прыцягвае замежнікаў у свае брыгады (напрыклад, брыгада аператыўнага прызначэння «Хартыя»).

Такім чынам, замежны добраахвотніцкі рух ва Украіне — гэта жывы, шматгранны арганізм, які дзейнічае на ўсіх узроўнях: ад пяхоты да спецназа, і пра яго ліквідацыю не можа быць і гаворкі.

2. Ці праўда, што Інтэрнацыянальныя легіёны УСУ распускаюць?

Не, гэта няпраўда. Інтэрнацыянальныя легіёны не знікаюць. Яны трансфармуюцца, каб стаць мацнейшымі. Замест таго каб быць асобнымі «лёгкімі» батальёнамі, падраздзяленні легіянераў інтэгруюцца ў склад эфектыўных і вопытных брыгад Узброеных Сіл. Цяпер яны становяцца часткай вялікага вайсковага арганізма.

3. Чаму замежнікаў пераводзяць у лінейныя брыгады?

Каб даць ім лепшую зброю і абарону. Раней легіянеры часта дзейнічалі як лёгкая пяхота. У складзе вялікай механізаванай брыгады замежнае падраздзяленне атрымлівае доступ да рэсурсаў і лагістыкі рэгулярных злучэнняў. Гаворка ідзе пра тое, каб тыя ж баявыя задачы выконваліся з надзейным прыкрыццём цяжкай тэхнікай, якую мае рэгулярная брыгада.

4. Што будзе з вузкапрофільнымі спецыялістамі (медыкамі, аператарамі БПЛА і інш.)?

Яны будуць працаваць па спецыяльнасці. Ніхто не будзе «забіваць мікраскопам цвікі». Войска зацікаўлена ў эфектыўнасці, таму снайперы, пілоты дронаў ці парамедыкі будуць займаць адпаведныя пасады ў профільных ротах сваіх новых брыгад. Больш за тое, замежнік мае права выбару: калі яму не падыходзіць брыгада УСУ, ён можа перавесціся ў іншыя структуры — напрыклад, у падраздзяленні ГУР, ССА ці Нацыянальнай гвардыі, пра якія згадвалася вышэй.

Украіна цэніць кожнага замежнага добраахвотніка. Украінскае войска прыбірае бар’еры паміж сваімі і замежнікамі. Грамадзяне іншых краін, якія абараняюць нашу зямлю, маюць абсалютна тыя ж правы, сацыяльныя гарантыі і, што самае галоўнае, той самы ўзровень падтрымкі і забеспячэння, што і ўкраінскія воіны.

Замежнікаў чакаюць у Сілах абароны — украінскае войска становіцца адзінай, яшчэ больш магутнай сілай.